2017-09-25【RMAC實戰訓練(龍Sir)】渣馬 Are You Ready?
/香港跑步界最重要嘅比賽渣打香港馬拉松剛剛接受報名，唔知大家夠唔夠快手同運氣。但唔知道你開始準備未。
師兄咪玩啦，剛剛先報完名仲要2018年1月先比賽邊洗咁快準備。如果你有咁嘅諗法我就只好同你講句good luck喇。
香港馬拉松近年喺國際長跑地位、運動品牌以至影音用品都係商家必爭之地。甚至越來越多品牌及物理治療師都因此開設了不同workshop去爭取曝光。
咁作為大眾，跑手或初學者可以點做呢？
無論係旅行、工作、儲蓄、上車等都需要有一個詳細嘅計劃，更何況係參加馬拉松，咁要準備一個比賽到底要幾耐呢？喺我答你依個問題前我先要知道你嘅具體資料，例如比賽距離/你訂立嘅比賽目標/你嘅運動水平/年齡/你嘅過往運動歷史等等。有人話三個月，甚至有人話二年。當然你要清楚知道自己係報左咩距離嘅比賽。咩呀？咪香港馬拉松囉⋯⋯Well, actually 咁你報左10km, 半馬定全馬先。作為新手嘅你，要表達得清楚小小，唔係會俾人笑(^_^)v
咁到底要點樣準備先！大家可能滿腦子問號，係時候俾個清晰嘅概念大家。當我地講點樣準備比賽時，大家需要明白訓練週期同訓練計劃的重要性。訓練週期可以由長達兩三年（主要俾全職運動員），一年（適合業餘跑手），三個月至四星期（適合一星期作兩至三次練習的跑手）。
吓！咪玩啦師兄，我只係想完成咋。
咁就要講件事俾你聽。喺N年前，未有電話既年代，有個人為左將戰爭完結既消息傳遞俾其他人知，所以佢跑左42km，然後佢死左。係，佢死左。死左。重要嘅野要講三次，依個就係馬拉松嘅起源。新手們，聽完係咪有d驚驚(￣∇￣)
訓練週期
資料來源:IAAF教練參考書
師兄，Life is short 如果我只係得三個月時間咁可以點玩法。要提升長跑運動水平，提升帶氧同抗乳酸系統係致勝關鍵，因此三個月至四星期嘅訓練週期就較適合大家。計劃訓練時，大家必須緊記三上一落的基本原則，即係連續三星期增加訓練量及提升訓練強度後必須有一星期的回落調整。我用每週訓練量做一個例子，week 1 總里數 20km –>week 2總里數 24km –>week3 總里數 26km → week4 總里數 18 or 20km。三個月的話就可以三上一落 X 3次。
當然有三上一落只係基本原則，有人會二上一落亦有人會四上一落，最終要以跑手的水平及身體狀況而定。如果大家係業餘跑手咁一年的訓劃就比較適合大家，我地可以將12個月簡單分為4個階段–>準備期(6月至8月)，準備比賽期(9月至11月)，比賽期(12月至3月)同調整期(4月至5月)。
每星期訓練需盡量包括心肺功能、耐力、肌力等。詳情會係之後嘅長跑訓練元素中同大家研究下。
教練於準備訓練計劃時除了三上一落的基本原則外，還會為運動員計劃重點比賽及預賽於操的練習賽，cross-sport training 及調整性訓練等。
現在剛剛進入準備比賽期(9月至11月)，下一篇文章，我會用一個個案去介紹如何準備，希望令大家容易明白和可以應用。有興趣了解不同訓練週期內既訓練內容有何不同的跑友可以閱讀另一文章–>訓練週期。