2018-07-20 愛跑才會贏：我嘅黃馬之旅

“跑馬初心”
幾年前如果你問我like 唔like 跑步? 我會答你絕對唔係我杯「茶」....偶然會撐下公司贊助既10k公益金慈善跑！跑完第二朝雙腳變咗機械腳，真係舉步難行。不過，我依家可以好肯定咁答你，”我！愛！跑！”

點解要跑呢？每個人都有唔同嘅答案； 而我係因為某次飯局傾開跑步呢個話題，被問到：「跑幾長呀？全馬好難頂㗎！渣馬報名要搶！」因而挑起跑步筋，睇下全馬有幾吸引？自己可以跑得幾快、跑得幾遠？

2015年被好友邀請去柏林🇩🇪跑全馬？心諗：馬拉松 ? 去馬拉松運動鋪頭就去得多，響電視睇人跑又見得多，自己跑全馬？！唔好玩啦， 跑唔掂點算呀？最後就當去旅行嘅心態，括出去跑世界！
當日天氣好，風景好靚，現場氣氛超正，冇諗過初哥嘅我可跑入Sub4 (3:55)，開心到忍唔住流咗幾滴男兒淚(** 連個老婆去左邊都唔記得左)，跑完全程旅行又變咗機械腳😅
2016年，東馬🇯🇵比柏林🇩🇪初馬PB快咗10分鐘，跑進345。自此更愛上馬拉松，尤其係六大满貫賽事！（又有籍口邊跑邊旅行）

“人生馬拉松，馬拉松人生”
2016年膽粗粗去跑三場大滿貫（倫敦🇬🇧、柏林🇩🇪及芝加哥🇺🇸），正當一切準備就緒，3月初工傷加上跑傷，完全打亂曬個plan。唔駛問成績當然離曬地，做出454 PW (Personal Worst) 。係呢一年，令我有點氣餒及迷失！心中出現好多問號 : 係唔係全馬唔啱我呢？身體負荷唔到呢？年紀大，機器壞…. 
 
原來「上帝早巳預備」，2017年Johnny邀請我加入RMAC試堂，一試後覺得一齊跑又幾好玩喎。在常規訓練及Coaching Yourself 課程中領會到有系統既跑步知識，正確跑姿技巧、肌群訓練以及預防受傷等專業知識。唸番起，未加入RMAC之前，連正確熱身動作都唔識！我太太話我死跑爛跑，人跑我又跑！

“沒有奇蹟，只有累積”
自慚唔係一個熱血跑友，平時少練長課，只靠每次上堂盡力做！通過Elite Team及長跑聯盟等高强度訓練令我心肺耐力、配速開始有明顕提升。係2018年再戰東馬🇯🇵時跑進3:23，比上次東馬3:45，快咗22分鐘，大PB。此役後重拾信心，再次燃起我波士頓🇺🇸BQ的希望。3月初透過跑會得知7月1日有一個出名易做PB嘅澳洲🇦🇺黃金海岸馬拉松賽事，唔駛唸咁多即報。但訓練不久，四月中右膝軟組織發炎，要停練3周及要做物理治療。最後6周刻意加強fast tempo, short & long interval 同埋LSD練習，希望盡快提升狀態。

“沒有最快，只有更快”
因未能按原定計劃完成訓練，唯有抱着”跑、玩、食”的輕鬆心情去黃金海岸！放鬆心情及賽前瞓得好係我今次黃馬既得著。比賽當日，清晨落過雨、陰天、15度；早餐、存包、熱身一切都非常順利，無包袱下用4:45 pace開，以10k為小目標，睇下自己可以頂得幾耐。跑咗5k後小腿覺得好緊，突然唸起龍sir及文sir經常提醒我地要擺手、膊頭放鬆、抬腿摺腳、核心收緊、身向前傾及深呼吸等心法放鬆跑。正如Ivan sir 話斎： 越跑越快，專注每步！當然唔少得太太沿途打氣，令我好有力量向前衝衝衝！最終以3:21:24完成！I’ve made it💪💪💪！比2月東馬🇯🇵PB快咗1分50秒，達BQ報名要求3:25更進一步！這次賽事令我學懂放鬆心情，從逆境中學習及成長，能夠作出改變先至係最可貴的！訓練既汗水係唔會白流；盡力去爭取好成績先至對得住支持我既人。跑步不單帶比我快樂既安多芬及健康，最幸福既莫過於一班志同道合熱愛跑步既朋友為各自目標一齊練習！一齊比賽！為下一個目標進發！
 
#感謝已故好友Tina鼓勵我一齊跑柏林🇩🇪初馬！
#感謝龍🐍、文🐍及RMAC眾教練既教導及一起跑過的日子既跑友！參加跑會後，學懂了跑步貼士，最近2次全馬bye bye 機械腳，令我玩得開心 !
#真心推介Coaching Yourself 課程 (我不是打手)
#同Ivan 🐍暢飲，食好嘢，詳談跑步經歷，沙灘漫步，享受海風！
#特別感激太太每場賽事企足幾粒鐘為我打氣及影靚相;  Vio 伉儷及Ivan sir同行一齊玩、跑、食！